Ka Nu Aw Kan Ngai Tuk Ee
- SUNDAY, 29 MAY 2013 16:32
- CHIN DAWTMI ONLINE NEWS
Maw sunghno ka nu na dam maw? Ka nu, na dam maw tin thinlung in kan hlam zungzal kan ngai tuk ka nu aw. Semmawng ka si lio caan ka van ruah ṭhan tikah ka nu, na dawtnak asunglawi tuk hringhran. Thlapa thla (9) chung harsat, retheihnak tampi tuar buin na ka pawi. Thihnak le nunnak ri ah um in maw, nganfahnak vialte kha tuar in thlanhri rual le na thisen he na rak ka hrin.Ka nu aw, lunghno in ka ṭah zawn ah zaihla dawh sa in na awnem thlumte he na rak ka hnemh tawn kha ka hnathlam ah a cuang zungzal. Zan ka ih merem khawh nakding caah tiin na ban nemte cu chantling ah na rak ka tlinh.
Kei na fa ka semka in na hnukthlum in na ka cawm i, na ṭanglum tangah na ka cawi i na ka thlim. Ka nu aw, na kaa chung lut dingmi hmanh ei siang loin maw na fa kei ka caah na chiah i, rawlṭam tihal tuar tu kha na rak i thim. Nang cu na fa kei ka caah nun a siang biktu le a ka daw biktu ka nu na si.
Zaan ka ih merem karah maw ka lu cungah na kut kha chuan in Pa Pathian sinah na fa kei ka caah mitthli he thlaza na cam tawn. A luancia caan ka tuanbia ka ruah ṭhan tikah ka cungah ṭhatlonak voikhat te zong a tuah sual bal lomi ka nu dawtnak thlum hlam loin ka um kho lo. Kum le caan hna cu an liam i, ka nu na dawtnak an thlum chinchin. Ka nu aw, atu na fa ka kum le khua an van upa deuhdeuh i nang na dawtnak hna cu ka nunnak ah a thlum in a thlum chin deuhdeuh ee.
Fale caah na thisen a chuakmi, na thlanti a chuakmi vialte hi retheih ah na chia bal lo. Ka nu aw, innchungkhar ca na ruah le na fale kan ca na ruah ah voikhat te hmanh a har tuk ee tiin na zai sual in na hraang sual bal lo. Na dawtnak hi zeizong vialte hmanh he tahchunh awk a ṭha lomi le zeihmanh nih a tluk lomi dawtnak ngeitu nu na si.
Na fa kei ka cungah hin a ziah hme mahtluk taitai ko in hin na dawtnak hi a ngan hnga i, na ka dawt hnga? Ka nu, nang cu ruah len zongah ruahphak khawh lomi na fa kei cungah dawtnak a ngeitu na si. Na dawtnak hi zeibantuk he hmanh tahchunh khawh ding a si lo. Dawtnak lakah a sang bik, a thuk bik le a thlum bikin na ka thuamh. Ka nu, kei cu na mitthli tlaktertu le na ngaih an chiattertu si ko hmanh ning law na fa kei ka cungah ai thleng bal lomi le ai khat zungzalmi dawtnak in na ka zohkhenh zungzal i na ka ṭhithruai zungzal. Ka nu, nang na dawtnak nih hin nifatin ka nunnak lamthluan ah hnangamnak a ka pek i thazang thar a ka pek zungzal.
Harsatnak hna le ṭihphan awk vialte ka ton caan zongah "Ka fa, ṭih hlah! Na nu ka um ko" tiah hnangamnak bia na ka chimh tawnmi bia hna kha na fa kei ka caah a ṭhawng bikmi le a sunglawi bikmi an si ko ee. Ka nu, na cungah kai lawmtuk hringhran. Pathian nih damnak thluachuah in pe ko seh mu.
"Hringtu Nule Ni" kan phan ṭhan cang hna. Mi tampi hna cu an dawtmi an nu le sinah hmaitonh tein "Ka nu, na cungah kaa lawmtuk, kan dawt tuk ee" tiah lawmhnak bia an chim lio caan ah kei cu phone chung lawngin maw na aw ka theih khawh ko ne lai ka nu aw. Mi a cheu tampi hna cu an nule phone chonh awk zong an ngeih ti hna lo lioah phone chonh khawh dingin nu kan ngeih rihmi cungah kai lawm tuk i, Pathian ka thangṭhat.
Ka nu, cham khawh lomi na dawtnak hi ka cungah dongh ni a um lo. Cerhti bangin a luang zungzal ko ee. Ka nu, kan dawt tuk ee. Pathian nih ngandamnak le nunkhuasaunak thluachuah in pe ko seh. Kan ngai tuk ee..., ka nu aw.
Hi capar in "Hringtu Nule vialte" upatnak kan pek hna. Hringtu nule nan dihlak Bawipa nih ngandamnak le nunkhuasaunak thluachuah in pe ko hna seh.
Atu cu "Ka nu dawtnak" timi hla ngai dingin kan sawm hna.
http://www.youtube.com/watch? FRANCIS.....
No comments:
Post a Comment